पत्रकारांनी संकटांकडे संधी म्हणून पाहावे : राष्ट्रीय अध्यक्ष अनिल मस्के

प्रतिनिधी :- मोहन खुडे

सांगली : “संकटं ही नवी संधी घेऊन येतात. कोरोनासारख्या महाभयंकर संकटाच्या काळात ‘व्हॉईस ऑफ मीडिया’चा जन्म झाला आणि आज ही संघटना जगभरात विस्तारली आहे. त्यामुळे पत्रकारांनी संकटांना न घाबरता त्याकडे एक संधी म्हणून पाहावे,” असे थेट व आक्रमक आवाहन ‘व्हॉईस ऑफ मीडिया’ पत्रकार संघटनेचे राष्ट्रीय अध्यक्ष अनिल मस्के यांनी केले.

‘व्हॉईस ऑफ मीडिया’ व ‘व्ही. ओ. एम. इंटरनॅशनल फोरम’च्या वतीने सांगली येथे पश्चिम महाराष्ट्र विभागीय केडर कँपचे आयोजन करण्यात आले होते. या शिबिराला सांगली, सातारा, सोलापूर, कोल्हापूर आणि पुणे जिल्ह्यांसह राज्यभरातील पत्रकारांनी मोठा प्रतिसाद दिला.

उद्घाटन व प्रमुख उपस्थितांचे विचार

कार्यक्रमाचे उद्घाटन सांगलीचे पोलीस अधीक्षक तुषार दोशी व जिल्हा परिषदेचे मुख्य कार्यकारी अधिकारी विशाल नरवाडे यांच्या हस्ते पार पडले. राष्ट्रीय अध्यक्ष अनिल मस्के यांनी कार्यक्रमाचे अध्यक्षस्थान भूषविले. व्यासपीठावर प्रदेशाध्यक्ष विजय चोरडिया, उपाध्यक्ष संगम कोटलवार, महिला आघाडीच्या राष्ट्रीय संघटक रश्मी मारवाडे, प्रदेशाध्यक्ष वैशाली पाटील, राज्य सरचिटणीस तथा विभागीय अध्यक्ष सचिन मोहिते आणि व्याख्याते अभय भंडारी उपस्थित होते.

• लोकशाहीचा कणा भक्कम ठेवण्यात पत्रकारांचे योगदान : तुषार दोशी (पोलीस अधीक्षक) “अनेक देशांत लोकशाही टिकली नाही, पण भारताला प्रखर पत्रकारितेचा वारसा लाभल्याने इथे लोकशाही टिकून आहे. बदलत्या काळात डिजिटल मीडिया आणि चॅनल्समुळे आव्हाने वाढली असून पत्रकारितेची विश्‍वासार्हता जपणे हे मोठे चॅलेंज आहे. असे प्रशिक्षण कँप पत्रकारांना नवी दिशा देतील.”
• पत्रकारांचा आवाज बनणारी संघटना : विशाल नरवाडे (CEO, जि. प.) “पत्रकार नेहमी तळागाळातील माणसाचा आवाज प्रशासनापर्यंत पोहोचवतात, पण पत्रकारांचा आवाज ‘व्हॉईस ऑफ मीडिया’ बनत आहे, ही कौतुकास्पद बाब आहे. पत्रकार, त्यांचे कुटुंब, आरोग्य, मुलांचे शिक्षण आणि पेन्शन या पंचसूत्रीवर काम करणाऱ्या या संघटनेच्या पाठीशी शासन-प्रशासन ठाम उभे राहील.”

पत्रकारांच्या कल्याणासाठी ठोस पावले

प्रदेशाध्यक्ष विजय चोरडिया यांनी पत्रकारांसाठी आरोग्य विमा, मुलांसाठी शैक्षणिक कीट वाटप आणि आपत्कालीन मदतीचे महत्त्व अधोरेखित केले. “नवीन तंत्रज्ञानाचा वापर करून निर्भयपणे पत्रकारिता कशी करावी, हे शिकवणारा हा केडर कँप असून मिळालेली ही ऊर्जा प्रत्येकाने आपापल्या तालुक्यात व जिल्ह्यात जाऊन संघटनेच्या मजबुतीसाठी वापरावी,” असे चोरडिया म्हणाले.

राष्ट्रीय अध्यक्ष अनिल मस्के यांनी आपल्या भाषणात पत्रकारांच्या सद्यस्थितीवर आणि स्वातंत्र्यावर चिंता व्यक्त केली. ते म्हणाले, “जगातील १८० देशांच्या लोकशाहीत पत्रकारितेच्या स्वातंत्र्याबाबत भारत १५७ व्या क्रमांकावर आहे. ग्रामीण व शहरातील पत्रकार आजही बिकट परिस्थितीत जगत आहेत. गेल्या ४ वर्षांपासून आम्ही ‘पत्रकार आर्थिक विकास महामंडळा’ची मागणी करत आहोत. या महामंडळाद्वारे पत्रकारांना व्यवसायासाठी बिनव्याजी कर्ज मिळायला हवे, जेणेकरून ते आर्थिकदृष्ट्या सक्षम होतील.”

असा पार पडला सोहळा

• मार्गदर्शन : व्याख्याते अभय भंडारी यांनी ‘पत्रकारिता आणि समाज’ या विषयावर सखोल मार्गदर्शन केले.
• आयोजन व आभार : कार्यक्रमाचे स्वागत सांगली जिल्हाध्यक्ष सूर्यकांत कुकडे यांनी केले, प्रास्ताविक पश्चिम महाराष्ट्र विभागीय अध्यक्ष सचिन मोहिते यांनी मांडले, तर आभार अल्ताफ खतीब यांनी मानले.

या प्रसंगी सातारचे जिल्हाध्यक्ष अनिल करंदकर, कोल्हापूरचे स्वप्नील कांबळे, पुण्याचे अझहर कादरी, सोलापूरचे धनराज बागले, दीपक ढवळे, गणेश आवळे, नित्यानंद कुंभार, जे. वाय. पाटील यांच्यासह पश्चिम महाराष्ट्रातील तालुकाध्यक्ष, पदाधिकारी व सदस्य मोठ्या संख्येने उपस्थित होते.