साताऱ्यात कासव तस्करीचा पर्दाफाश! ५० हजारांचे दुर्मिळ कासव अन् दोन दुचाकींसह ४ जण तालुका पोलिसांच्या जाळ्यात.

सातारा (प्रतिनिधी): साताऱ्यात दुर्मिळ प्रजातीच्या कासवाची बेकायदेशीर तस्करी आणि विक्री करणाऱ्या टोळीवर सातारा तालुका पोलिसांनी मोठी कारवाई केली आहे. लिंब खिंड परिसरामध्ये सापळा रचून पोलिसांनी ४ संशयित तस्करांना ताब्यात घेतले असून त्यांच्याकडून सुमारे ५०,००० रुपये किमतीचे ‘इंडियन सॉफ्टसेल टर्टल’ (Indian Softshell Turtle) जातीचे दुर्मिळ कासव आणि दोन मोटारसायकल जप्त करण्यात आल्या आहेत.

नेमकी घटना काय?

सातारा तालुका पोलीस ठाण्याच्या हद्दीमध्ये वन्य प्राण्यांची तस्करी व विक्री करणाऱ्यांवर कडक कारवाई करण्याचे आदेश जिल्हा पोलीस अधीक्षक श्री. निखिल पिंगळे, अपर पोलीस अधीक्षक श्रीमती वैशाली कडूकर, उपविभागीय पोलीस अधिकारी श्री. विपुल पाटील आणि पोलीस निरीक्षक श्री. निलेश तांबे यांनी दिले होते.

दरम्यान, लिंब खिंड परिसरामध्ये काही इसम तस्करी केलेल्या कासवाची विक्री करण्यासाठी येणार असल्याची गोपनीय माहिती गुन्हे प्रकटीकरण शाखेचे पो.हवा. राजू शिखरे यांना मिळाली होती.

पोलिसांनी असा रचला सापळा

माहिती मिळताच पोलीस निरीक्षक श्री. निलेश तांबे यांच्या मार्गदर्शनाखाली सहाय्यक पोलीस निरीक्षक सी. एस. पाटील, पो.हवा. राजू शिखरे, मनोज गायकवाड आणि पो.शि. संदीप पांडव यांनी लिंब खिंड परिसरात अत्यंत कौशल्याने सापळा रचला.

संशयित आरोपी कासव विक्रीसाठी आले असता पोलिसांनी त्यांना रंगेहात पकडले. या कारवाईत: १) प्रज्वल विजय सावंत २) केतन विनोद जाधव आणि त्यांच्यासोबत असलेल्या २ अल्पवयीन बालकांना पोलिसांनी ताब्यात घेतले.

 मुद्देमाल जप्त आणि पुढील तपास

संशयितांच्या ताब्यातून काळसर रंगाचे सुमारे ५० हजार रुपये किमतीचे ‘इंडियन सॉफ्टसेल टर्टल’ जातीचे दुर्मिळ कासव आणि तस्करीसाठी वापरलेल्या दोन मोटारसायकली हस्तगत करण्यात आल्या आहेत.

संशयितांनी हे कासव कोठून आणले आणि ते कोणाला विकणार होते, याचा सखोल तपास सध्या पोलीस करत आहेत. सदर गुन्ह्याचा पुढील तपास सहाय्यक पोलीस निरीक्षक सी. एस. पाटील करत आहेत.

कारवाई करणारे पथक

ही धडक कारवाई वरिष्ठ अधिकाऱ्यांच्या मार्गदर्शनाखाली सहाय्यक पोलीस निरीक्षक सुदर्शन काटकर, चंद्रहार पाटील, पोलीस उपनिरीक्षक अभिजित गुरव, पोलीस अंमलदार राजू शिखरे, मनोज गायकवाड, संदीप आवळे, सतीश बाबर, दादा स्वामी, पंकज ढाणे, संदीप पांडव, सुनील भोसले आणि सचिन झणकर यांच्या पथकाने केली.

या यशस्वी कारवाईबद्दल पोलीस अधीक्षक श्री. निखिल पिंगळे व अपर पोलीस अधीक्षक श्रीमती वैशाली कडूकर यांनी संपूर्ण पोलीस पथकाचे विशेष अभिनंदन केले आहे.