बामणोलीत वनविभाग झोपलाय का? दुरुस्तीअभावी वनपरिमंडळ कार्यालय धुळखात; छत्रपती संघटनेचा प्रशासनाला इशारा!

प्रतिनिधी श्रीकांत गोळे.

बामणोली (विशेष प्रतिनिधी) : शासनाचे कोट्यवधी रुपये कागदावर खर्च होत असताना, प्रत्यक्ष ग्रामीण भागात मात्र प्रशासकीय कार्यालये धूळखात पडून असल्याचा संतापजनक प्रकार बामणोली येथे समोर आला आहे. बामणोली येथील वनपरिमंडळ कार्यालय केवळ दुरुस्तीअभावी बंद पडून असल्याने परिसरातील सर्वसामान्य नागरिक, शेतकरी आणि ग्रामस्थांचे प्रचंड हाल होत आहेत. वनविभागाच्या या भोंगळ आणि अकार्यक्षम कारभारावर ‘छत्रपती संघटना महाराष्ट्र राज्य’ च्या वतीने तीव्र संताप व्यक्त करण्यात आला असून, हे कार्यालय तातडीने सुरू न झाल्यास आक्रमक पवित्रा घेण्याचा इशारा देण्यात आला आहे.

अधिकारी मस्त, शेतकरी त्रस्त!

बामणोली आणि परिसरातील दुर्गम गावांमधील शेतकऱ्यांना दररोज वन्यप्राण्यांच्या उपद्रवाला सामोरे जावे लागते. पिकांचे नुकसान झाले तर नुकसानभरपाईचा अर्ज भरणे, वन्यजीव हल्ल्याच्या तक्रारी नोंदवणे किंवा वनविभागाच्या दाखल्यांसाठी नागरिकांना स्थानिक पातळीवर कोणतीही सुविधा उपलब्ध नाही. एका छोट्या कामासाठीही शेतकऱ्यांना आणि ग्रामस्थांना नाहक मेढा येथील वनपरिक्षेत्र कार्यालयापर्यंत हेलपाटे मारावे लागत आहेत. यात गोरगरीब नागरिकांचा वेळ, पैसा आणि श्रम प्रचंड प्रमाणात वाया जात आहेत.

नुकसानभरपाई मिळणार कशी?

शेतात वन्यप्राण्यांनी धुमाकूळ घातल्यानंतर वेळेत पंचनामा होणे आणि अर्ज सादर करणे गरजेचे असते. मात्र, बामणोलीचे कार्यालयच कुलूपबंद आणि दुरवस्थेत पडून असल्याने शेतकऱ्यांचा पाठपुरावा रखडत आहे. “शासकीय सेवा थेट जनतेच्या दारात देण्याच्या गप्पा मारणारे अधिकारी प्रत्यक्ष कामाच्या वेळी कुठे गायब असतात?” असा जळजळीत सवाल आता ग्रामस्थ विचारत आहेत.

छत्रपती संघटनेची कडक मागणी व इशारा:

या अत्यंत गंभीर आणि संवेदनशील प्रश्नावर छत्रपती संघटना महाराष्ट्र राज्य आक्रमक झाली आहे. संघटनेने वनविभागाच्या वरिष्ठ अधिकाऱ्यांकडे खालील मागण्या मांडल्या आहेत:

• कार्यालयाची तातडीने पाहणी करा: वरिष्ठ अधिकाऱ्यांनी एसी गाड्यांतून बाहेर पडून बामणोली कार्यालयाची प्रत्यक्ष पाहणी करावी.
• तातडीने दुरुस्ती अन् कामकाज सुरू करा: कार्यालयाची डागडुजी करून तेथे नियमित कर्मचारी व अधिकारी नियुक्त करावेत.
• स्थानिक पातळीवर सेवा द्या: शेतकरी व ग्रामस्थांची मेढा येथील पायपीट कायमची थांबवावी.

“सर्वसामान्य नागरिक आणि शेतकऱ्यांना नाहक त्रास देणारा हा कारभार खपवून घेतला जाणार नाही. प्रशासनाने याप्रकरणी तात्काळ ठोस पावले उचलून बामणोली वनपरिमंडळ कार्यालय पूर्ववत सुरू न केल्यास, ग्रामस्थांना सोबत घेऊन तीव्र जनआंदोलन उभारले जाईल!” — छत्रपती संघटना, महाराष्ट्र राज्य

आता तरी वनविभागाचे वरिष्ठ अधिकारी झोपेतून जागे होऊन या कार्यालयाचे कुलूप उघडणार की ग्रामस्थांच्या रोषाला सामोरे जाणार? हेच पाहणे महत्त्वाचे ठरणार आहे.