शिस्त, परंपरा आणि आनंद! मेढा पोलिसांचा डॉल्बीमुक्त निरोप; ‘डॉन’ गाण्यावर ठेका धरत घालून दिला अनोखा आदर्श

मेढा (प्रतिनिधी श्रीकांत गोळे): सण-उत्सव आले की नागरिक कुटुंबासोबत आनंद साजरा करण्यात मग्न असतात, तर दुसरीकडे खाकी वर्दीतील पोलीस अधिकारी व कर्मचारी मात्र २४ तास ऑन-ड्यूटी राहून कायदा आणि सुव्यवस्था राखण्यात व्यस्त असतात. सततचा मानसिक तणाव, उन्हा-पावसातील बंदोबस्त आणि कुटुंबापासून दुरावा… या सगळ्या कसरतीतून वेळ काढत मेढा पोलीस ठाण्याने गणेशोत्सवात एका वेगळ्याच सकारात्मक ऊर्जेचा परिचय दिला आहे. सर्वोच्च न्यायालयाचे सर्व नियम पाळत, डॉल्बीला पूर्णपणे फाटा देऊन आणि पारंपरिक ढोल-ताशांच्या गजरात मेढा पोलिसांनी आपल्या ठाण्यातील गणपती बाप्पाला शिस्तबद्ध आणि उत्साहपूर्ण निरोप दिला.

गेल्या काही दिवसांपासून सातारा जिल्ह्यात गणेशोत्सव शांततेत पार पाडण्यासाठी पोलीस अहोरात्र रस्त्यावर पहारा देत होते. आगामी नवरात्रोत्सव, राजकीय सभा, आंदोलने आणि पदवीधर मतदारसंघाच्या निवडणुकांच्या पार्श्वभूमीवर कामाचा मोठा ताण असतानाही, मेढा पोलीस ठाण्याचे सहाय्यक पोलीस निरीक्षक (सपोनि) सुधीर पाटील आणि त्यांच्या सहकाऱ्यांनी उत्सवाचा आनंदही तितक्याच शिस्तीने लुटला.

कायद्याचे भान आणि परंपरेची शान

एरव्ही मिरवणुकीत कर्णकर्कश डीजेच्या आवाजावरून वाद निर्माण होतात. परंतु, मेढा पोलिसांनी स्वतःच समाजासमोर एक आदर्श वस्तुपाठ घालून दिला:

• डीजेला फाटा, ढोल-ताशांना पसंती: सर्वोच्च न्यायालयाच्या ध्वनीप्रदूषणविषयक सर्व नियमांचे तंतोतंत पालन करत पोलिसांनी मिरवणुकीत केवळ पारंपरिक ढोल-ताशांचा गजर ठेवला.
• वाहतुकीला शून्य अडथळा: मेढा बाजारपेठेतून मिरवणूक जात असताना सामान्य नागरिकांना व वाहनधारकांना कोणताही त्रास होणार नाही, अशा रीतीने रस्त्याच्या एका बाजूने अत्यंत शिस्तीत ही मिरवणूक काढण्यात आली.
• पर्यावरणपूरक विसर्जन: बाप्पाचे विसर्जन वेण्णा नदीच्या तीरावर पर्यावरणपूरक पद्धतीने करण्यात आले.

सर्व पोलिसांनी एकसारखे टी-शर्ट परिधान करून अत्यंत साध्या पण प्रभावी रूपात मिरवणुकीत सहभाग घेतला. एरव्ही कडक शिस्तीत दिसणारे पोलीस अधिकारी व कर्मचारी ढोल-ताशांच्या तालावर आणि “मै हु डॉन” या गाण्याच्या तालावर विना-डॉल्बी बिनधास्त नाचताना दिसले. कामाच्या प्रचंड तणावातून काही क्षण बाजूला काढून आनंदाचा हा सोहळा साजरा करणाऱ्या पोलिसांचा हा मनमोकळा अवतार पाहून मेढा बाजारपेठेतील नागरिक अवाक झाले.

सतत कायद्याचा बडगा दाखवणाऱ्या पोलिसांनी स्वतः सर्व कायदेशीर नियम पाळून, पर्यावरणाचा संदेश देत आणि पारंपरिक संस्कृतीचा आदर राखत गणेशोत्सव साजरा केल्याने संपूर्ण सातारा जिल्ह्यातून मेढा पोलिसांचे कौतुक होत आहे. ‘नियम फक्त नागरिकांसाठी नसून पोलिसांसाठीही तेवढेच महत्त्वाचे आहेत’ हेच मेढा पोलिसांनी आपल्या कृतीतून सिद्ध करून दाखवले आहे.