कास पठारावर व्हीआयपी संस्कृती फोफावली? सामान्य पर्यटकांना ‘नो एन्ट्री’, पण ‘या’ कारला विशेष मुभा!

कास, ता. जावळी (प्रतिनिधी श्रीकांत गोळे) 

जागतिक वारसा स्थळ म्हणून प्रसिद्ध असलेल्या कास पुष्प पठार परिसरातील पार्किंग व्यवस्थेबाबत स्थानिक नागरिक, शेतकरी आणि पर्यटकांमध्ये तीव्र नाराजीचे वातावरण निर्माण झाले आहे. वन विभागाच्या नियंत्रणाखाली असलेल्या या संवेदनशील परिसरात काही वाहनांना विशेष परवानगी देऊन पार्किंगची मुभा दिली जात असल्याचे उघडकीस आले असून, यावरून ‘नियम सर्वांसाठी समान आहेत का?’ असा सवाल उपस्थित केला जात आहे.

काय आहे प्रकरण?

कास पठारावर दरवर्षी हजारो पर्यटक फुलांचा आनंद घेण्यासाठी येतात. या गर्दीवर नियंत्रण ठेवण्यासाठी आणि निसर्गाचे रक्षण करण्यासाठी वन विभागाने कडक नियम केले आहेत. सामान्य पर्यटकांना पठारावर वाहने नेण्यास बंदी असून, त्यांना लांबच्या पार्किंग लॉटमध्ये वाहने उभी करून जावे लागते. तसेच, स्थानिक ग्रामस्थ आणि इतर वाहनधारकांना अनेकदा पर्यायी घाटमार्गाचा वापर करण्याच्या सूचना दिल्या जातात.

मात्र, प्रसिद्ध बातमीसोबत मिळालेल्या एका छायाचित्राने (वरील फोटो पहा) वन विभागाच्या या दाव्यांवर प्रश्नचिन्ह उभे केले आहे. या फोटोमध्ये एक सिल्व्हर रंगाची होंडा सिटी कार (क्रमांक MH 12 KT 9747) चक्क पठारावरील प्रतिबंधित क्षेत्रात, जिथे इतर कोणत्याही पर्यटकांची वाहने दिसत नाहीत, तिथे आरामात पार्क केलेली दिसत आहे. विशेष म्हणजे, या कारवर लाल रंगात ‘न्यायाधीश‘ अशी पाटी लागलेली आहे. या एकाच फोटोमुळे प्रशासनाच्या ‘समान न्याय’ या तत्त्वावर प्रश्न उपस्थित झाले आहेत.

स्थानिकांचा आणि पर्यटकांचा संताप

“आम्हाला तासनतास लांब पार्किंगमध्ये गाडी लावून यावे लागते. पण काही लोकांना त्यांच्या पदाचा वापर करून थेट पठारावर गाडी आणण्याची परवानगी मिळते. हे अन्यायकारक आहे,” अशी प्रतिक्रिया मुंबईहून आलेल्या एका पर्यटकाने व्यक्त केली.

स्थानिक ग्रामस्थांनीही यावर तीव्र नाराजी व्यक्त केली आहे. “आम्हाला शेतात जाण्यासाठी किंवा कामासाठी वाहन वापरताना अनेक अडचणी येतात. नियमांचे पालन आम्ही करतोच, पण प्रशासनाने सर्वांना सारखेच वागवले पाहिजे. व्हीआयपी लोकांसाठी वेगळे आणि सामान्य लोकांसाठी वेगळे नियम असू नयेत,” असे एका स्थानिक शेतकऱ्याने सांगितले.

वन विभागाकडून स्पष्टीकरणाची मागणी

पार्किंगसंदर्भातील नियम, परवानग्या आणि त्यासाठीचे नेमके निकष काय आहेत, याबाबत वन विभागाने आपली भूमिका स्पष्ट करावी, अशी मागणी जोर धरत आहे. पर्यटक, स्थानिक नागरिक आणि इतर वाहनधारक यांच्यात कोणताही भेदभाव न करता सर्वांसाठी समान नियमांची अंमलबजावणी करण्यात यावी, तसेच पार्किंग व वाहतूक व्यवस्था पारदर्शक पद्धतीने राबविण्यात यावी, अशी अपेक्षा व्यक्त केली जात आहे.

कास पुष्प पठाराचे सौंदर्य आणि पर्यावरण टिकवून ठेवण्यासाठी वाहतूक व्यवस्थापन, सुरक्षितता आणि शिस्तबद्ध पार्किंग व्यवस्था यांना विशेष महत्त्व आहे. त्यामुळे प्रशासनाने या प्रकरणाची गांभीर्याने दखल घेऊन वस्तुस्थिती स्पष्ट करावी आणि पार्किंग व्यवस्थेतील ही विसंगती दूर करून सर्वांसाठी समान नियम लागू करावेत, अशी मागणी स्थानिक नागरिकांनी केली आहे.