गोकूळ प्राथमिक शाळेत ‘आषाढी वारी, पर्यावरण आणि साक्षरता दिंडी’ उत्साहात संपन्न.
सातारा जिल्हा बाल विकास समिती संचलित, गोकूळ प्राथमिक शाळा, कृष्णानगर येथे आषाढी एकादशीचे औचित्य साधून ‘आषाढी वारी व पर्यावरण, साक्षरता दिंडी’ सोहळा अत्यंत उत्साहात आणि भक्तिमय वातावरणात पार पडला.
शालेय परिसरातून काढण्यात आलेल्या या दिंडीत विद्यार्थ्यांनी वारकऱ्यांची पारंपारिक वेषभूषा परिधान केली होती. टाळ-मृदंगाचा गजर, विठ्ठल-रुक्मिणीचा जयघोष आणि अभंगांचे सूर यांनी संपूर्ण परिसर दुमदुमून गेला होता. लहानग्या वारकऱ्यांच्या या उत्साहाने उपस्थितांचे व नागरिकांचे लक्ष वेधून घेतले.
पर्यावरण व साक्षरतेचा दिला संदेश
केवळ धार्मिक उत्सव न ठेवता समाजात जनजागृती व्हावी या उद्देशाने विद्यार्थ्यांनी विविध संदेशांचे फलक हातात धरले होते. यामध्ये:
- “दारात झाडे लावण्याचा ध्यास, तरच मोकळा घ्याल श्वास”
- “धरती मातेची एकच हाक, झाडे लावा लाख लाख”
- “झाडे लावा घरोघरी, निसर्गाची सेवा खरी”
- “साक्षरतेचा दीप लावा, अज्ञानाचा अंधार दूर पळवा”
- “साक्षरतेची धरा कास, होईल प्रगतीची सुरुवात खास”
यांसारख्या विविध घोषणा देत विद्यार्थ्यांनी पर्यावरण संवर्धन आणि साक्षरतेचे महत्त्व पटवून दिले.
निसर्ग संवर्धनाचा प्रत्यक्ष वस्तुपाठ
निसर्गाचे संवर्धन ही प्रत्येकाची सामूहिक जबाबदारी आहे, हा विचार रुजवण्यासाठी शाळेच्या परिसरात आधीच शेकडो झाडे लावून त्यांची जोपासना केली जात आहे. शाळेतर्फे अशा विविध उपक्रमांचे सातत्याने आयोजन केले जाते.
सांस्कृतिक कार्यक्रम व सहभाग
दिंडीदरम्यान शाळेतील उपशिक्षिका श्रीम. सुवर्णा काळे यांनी बसवलेल्या ‘ज्ञानोबा माऊली तुकाराम’ या प्रसिद्ध भजनावर विद्यार्थ्यांनी सुरेख नृत्य सादर केले. सर्व विद्यार्थी या भक्तीरसात पूर्णपणे तल्लीन झाले होते.
या दिंडीच्या नियोजन आणि यशस्वी आयोजनात:
- शाळा व्यवस्थापन समितीच्या अध्यक्षा: सौ. निलम पाटील
- मुख्याध्यापिका: सौ. मिनल खटावकर
- बालवाडी प्रमुख: सौ. संध्या महामूलकर
- शिक्षक व शिक्षकेतर कर्मचारी: पदवीधर शिक्षक सौ. हर्षलता धनावडे, श्री. रामदास चौगुले, श्रीम. सुवर्णा काळे, श्री. संजय सावंत, श्री. शंशाकात चव्हाण, सौ. चित्रा शिंदे आणि कु. जयश्री घेवदे यांनी सक्रिय सहभाग नोंदवला.
शाळेचा हा स्तुत्य उपक्रम कृष्णानगर व सातारा परिसरात कौतुकाचा विषय ठरला आहे.
