गोकूळ प्राथमिक शाळेत ‘अल्फा लावल’ कंपनीच्या सीएसआर प्रमुखांची सदिच्छा भेट.!

गोकूळ प्राथमिक शाळेत ‘अल्फा लावल’ कंपनीच्या सीएसआर प्रमुखांची सदिच्छा भेट; लहानपणचे खेळ खेळत विद्यार्थ्यांशी साधला मनमोकळा संवाद!

गोकूळ प्राथमिक शाळेमध्ये नुकतीच जगप्रसिद्ध ‘अल्फा लावल’ (Alfa Laval) कंपनीच्या कॉर्पोरेट सोशल रिस्पॉन्सिबिलिटी (CSR) विभागाच्या वतीने एक विशेष सदिच्छा भेट आयोजित करण्यात आली होती.

या प्रसंगी कंपनीच्या पुणे शाखेच्या माननीय वनश्री वनकर (CSR प्रमुख) मनोज भस्मे (प्लांट एच आर हेड)
जयश्री पाटील (ऑफिसर – एच आर विभाग )यांनी शाळेला भेट देऊन विविध उपक्रमांत सहभाग घेतला.
शाळेत आगमन होताच मान्यवरांचे शालेय परंपरेनुसार उत्साहात स्वागत करण्यात आले. या भेटीदरम्यान अधिकारी वर्गाने संपूर्ण शाळेची, वर्गखोल्यांची आणि परिसराची अत्यंत बारकाईने पाहणी केली व शाळेच्या एकूणच व्यवस्थापनाबद्दल आणि शैक्षणिक वातावरणाबद्दल समाधान व्यक्त केले.
विद्यार्थ्यांचे कौतुक आणि बालपणीच्या आठवणींना उजाळा दिला.

या भेटीचे सर्वात सुंदर आणि आनंददायी वैशिष्ट्य म्हणजे मान्यवरांचा विद्यार्थ्यांशी झालेला थेट व जिव्हाळ्याचा संवाद. उच्च पदावर कार्यरत असलेल्या या अधिकाऱ्यांनी कोणतीही औपचारिकता न ठेवता, विद्यार्थ्यांमध्ये मिसळून आपले पद आणि वय विसरून बालपण अनुभवले. त्यांनी मुलांशी गप्पा मारल्या, त्यांच्या कलागुणांचे व हुशारीचे भरभरून कौतुक केले. एवढेच नव्हे तर, विद्यार्थ्यांसोबत लहान मुलांसारखे खेळ खेळून आपल्या बालपणीच्या काही सुवर्ण क्षणांना पुन्हा एकदा उजाळा दिला. या हसत-खेळत आणि मजेशीर वातावरणामुळे लहानग्या विद्यार्थ्यांच्या चेहऱ्यावर एक वेगळाच आनंद आणि उत्साह ओसंडून वाहत होता.

शालेय परिसर हरित आणि सुंदर व्हावा, तसेच विद्यार्थ्यांमध्ये लहानपणापासूनच पर्यावरण रक्षणाची आवड निर्माण व्हावी, या उद्देशाने या प्रसंगी मान्यवरांच्या हस्ते शालेय परिसरात वृक्षारोपण करण्यात आले. या लावलेल्या रोपट्यांचे मुलांप्रमाणेच संगोपन करण्याची जबाबदारी मान्यवरांनी आनंदाने स्वीकारली.

“गोकूळ प्राथमिक शाळेतील मुलांचा उत्साह, त्यांची निष्पाप उत्तरे आणि येथील सकारात्मक वातावरण पाहून आम्ही भारावून गेलो. मुलांसोबत खेळ खेळताना आम्ही आमचे बालपण पुन्हा जगलो, अशी भावना मान्यवरांनी यावेळी व्यक्त केली.”या अत्यंत प्रेरणादायी आणि कौतुकास्पद उपक्रमाबद्दल शाळेचे मुख्याध्यापक, सर्व शिक्षक वृंद, शिक्षकेतर कर्मचारी आणि शाळा व्यवस्थापन समितीच्या वतीने ‘अल्फा लावल’ कंपनीच्या सर्व आदरणीय पदाधिकाऱ्यांचे मनःपूर्वक आभार मानण्यात आले. या भेटीमुळे विद्यार्थ्यांमध्ये एक नवा आत्मविश्वास आणि उत्साह संचारला असून, सर्व स्तरांतून या भेटीचे कौतुक होत आहे.

यावेळी शाळा व्यवस्थापन समिती अध्यक्ष सौ. निलम पाटील, गोकूळ प्राथमिक शाळेच्या मुख्याध्यापिका सौ. मिनल खटावकर, बालवाडी प्रमुख सौ.संध्या महामूलकर, पदवीधर शिक्षिका सौ. वर्षालता धनावडे, श्री. रामदास चौगुले, श्रीम. सुवर्णा काळे, श्री. संजय सावंत, श्री. शशिकांत चव्हाण सौ. चित्रा शिंदे, कु.जयश्री घेवदे व सुनिता निकम उपस्थित होत्या.